引用:
原帖由 forcc 於 31-7-2018 11:39 PM 發表
數年前simon 對於所有違規POST 都一視同仁處理,
沒有灰色地帶
所以他出了一個嚴正聲明post
現在是不是用youtube share 2分鐘教學,就能合法在此宣傳個人profit-making網站?
http://lsforum.net/board/viewthr ...
問一個問題,如果你平時見倒廣告,你對嗰樣物件、商品或服務,你會如何處理?
答案簡單,就係唔理。
同樣道理,如果一個會員只係想知道某條past paper點做,其實佢冇興趣去補習。喺個Youtube既解釋片段入面出現一個小廣告,或者拍片者既個人網站(唔理佢牟利與否),按常理推斷,呢位求學問既會員會做既野,就係:睇片,哦,原來咁做,關閉視窗。
另外,讀過既書既人都知道,有唔少內容用文字或圖片都難以清楚解釋。尤其是需要說明某啲步驟,喺圖表上劃線(數理科常見,又或經濟學既供需圖)時,影片解說絕對比文字、圖片、論壇討論更為有效。
我地係咪要強迫會員用不含個人資料既途徑去分享影片呢?
另外,2分鐘教學唔代表冇意義。試諗下做MC,有時速度就係要2分鐘內做完一條。如果拍片人可以喺兩分鐘內話比人知,一條MC可以用某啲技巧30秒內做完,而用教科書方法可能要做5分鐘,佢呢段兩分鐘既片段係非常具教學意義。
***********************************
另一個我喺版主區內有討論既例子,係呢度:
http://lsforum.net/board/viewthr ... p;extra=&page=1
回覆後見倒有條FB link,係宣傳佢個人網站,按版規而言,犯規,屏蔽內容,關帖處理。
咪住先,你睇下啲內容?
人地嘔心瀝血一字一字打出黎,全部係自己既心得。係咪整左咁多野出黎,因為宣傳自己既網站,就要抹殺佢既努力呢?
第2,留意下該會員最後上線日子,係2017年。如果我係一個2018年讀緊歷史既學生,睇倒佢既帖子,我好想聯絡樓主問佢多啲問題,我可以點做呢?如果所有宣傳都被禁止,我既選擇就係PM樓主問佢問題,或者回覆佢開既post。但係,樓主早已於2017年離開小卒。你喺小卒內任何途徑都搵佢唔倒(當然有心人會識禁入去佢個人檔案搵佢email / 其它聯絡方法,但唔係每位會員都識咁做)。
但係我發現原來佢有個Facebook link。咁易做啦,我去Facebook 問佢問題咪得。仲可以睇倒佢keep住更新(而喺小卒入面冇再繼續更新)既資源添。
就咁睇,小卒好似比人“架空”左,過橋抽板咁。但係,冇左小卒,求學問既會員唔會搵倒出心得既樓主。即使佢地去左另一個平台討論,離開左小卒,小卒都最少發揮左佢引導人去討論既角色。
我地係咪要將所有學術討論都規限喺小卒入面呢?
***********************************
經濟學其中一個理論係:好多時你設計既規矩、政府諗既政策,係有好多你意想不到的反效果。有時你以為好全面地諗曬“所有”可能性,結果係會發生啲你完全預料唔倒既事。你以為做左會好啲,點知有時唔做會好啲。
日常生活既例子,就係$2老人乘車優惠。$2比老人家搭車周圍去,鼓勵佢地活動,原意非常好。咁而家繁忙時間發生咩事?就係一架可能係過海或者跨區既巴士,本來客滿可以飛站快啲上高速公路,但因為“$2客”,而要停一啲區內既站比佢地落車。
將宣傳“趕盡殺絕”,會唔會有啲我地預想唔到既負面效果呢?
************************************
我地究竟係去吸引一批咩本質既人加入小卒?
我既答案係:識得主動搵資源求學既人。可能佢地回覆,download完資源就走左人。未必會喺度開post發文,未必會帶倒好有建設性既討論,唔緊要。我係覺得冇問題。
制度使然。趕時間考DSE,我上黎想用最高速度搵倒by-topic exercise past paper notes 然後我走去溫書。有唔識既,可能會上黎問下。上黎發現冇人答,我問同學、問老師、問補習老師,出去其它有人氣既網站問問題,同人討論。
我當初喺小卒分享資源,目的好簡單。我係一個唔出去補習既人。我想呢個地方可以支持倒唔去補習,但願意付出時間發掘免費資源既人,搵倒佢地想要既野,然後用免費既資源都可以考倒好既成績。“世界上沒有免費午餐”。有時免費既筆記,可能上面就有某人既浮水印,有佢既補習宣傳。唔緊要,我拎倒我需要既野就得。正如我上面提到,我唔想睇既廣告,你送到我面前,我咪望兩眼之後唔理佢。
所以,如果有人願意為左提高佢既知名度(e.g. 做補習既),加個水印或者聯絡方式咁喺小卒入面分享筆記,我個人係無任歡迎。原因上面都講左 - 我既目標係呢度可以比唔想比錢補習既人獲得充足既資源應付公開考試。
係咪好功利呢?某程度上係。坦白講,喺香港既教育環境下,唔讀到大學都冇乜自由思考既空間。你同堆要準備DSE既學生講道理,話教育唔應該商品化等等,對佢成長有冇幫助?坦白而言冇乜。但你同DSE學生講,呢度有你需要既野幫你打低DSE,我諗佢地會對小卒比較有興趣。去到佢過左DSE嗰關,入到大學,大學既通識教育或者其它環境佢地都有機會接觸“教育商品化”呢個議題。到時佢地咪慢慢討論。
************************************
以上為個人淺見。