先從時間上講，嚴正聲明出現時間為2014年，你舉既例子係2010年或2011年出post，有關“嚴正聲明”未出現。
論無償分享，我自己都有做。ICT notes更加係我讀書時開始做既事：
http://lsforum.net/board/viewthr ... &extra=page%3D1
未有“嚴正聲明”時，我係放條link去我個人網站度，集中去下載。當時我係一個DSE都未考既學生，個網站當然唔牽涉任何補習宣傳，零商業成分。但受“嚴正聲明”所限，我問過時任版務人員，我呢種第三方網站分享而不含宣傳既形式，很抱歉，都係唔允許的。
當時我係好失望。我既個人網站不涉及任何營利活動。點解我放上去，係因為我upload筆記上去我有紀錄，同時可以睇倒唔同版本先後有幾多人下載。有關“嚴正聲明”推出時，我個人係反對的。奈何版規所限，為免其他人睇唔倒我既分享，我將下載平台改左做Google Drive，棄用個人網站。
時至今日，我分享既野仍然喺度，冇刪除過。
如果真係“執法嚴厲”，我自己開既post一早已被屏蔽（因為含有第三方個人網站）。由此側面證明，其實“嚴正聲明”出現前，冇所謂既“執法嚴厲”。當然你可以話我呢個係個別例子，但我未有足夠數據去了解究竟2014聲明出現前，呢度係咪“執法嚴厲”。
你能夠解釋為什麼小卒資訊論壇 人流一年少過一年嗎
可能原因有好多。我個人解釋係，社會會變，年輕人既習慣會變，接收資訊既渠道會變。
Facebook/IG/Whatsapp未活躍時，好多人放學就係翻屋企用電腦，用MSN同人溝通。當時未有出現咩Whatsapp 學習群組、Facebook 討論群組等等。論壇係一個廣泛獲認知為可以討論學術既地方，自然地人流就多。
同時，當年既雲端分享平台都冇而家咁普及。就算有呢類平台，免費既儲存空間都有一定限制。好少人可以免費整合堆資源出黎放上個cloud度比人下載。由此要喺呢度求檔，有人會喺度逐個逐個post咁開出黎做資源分享。
再另外，未將CE AL 拆做DSE時，讀書氣氛都差好遠。CE有一班人努力要夠分升原校或者拔尖等等。AL既要爭入大學更加勤力。所以喺考兩個公開試既人都有一大部分願意努力。準備時間又唔及而家有三年咁長。所以放假、放學自然咪上黎討論下學術問題，睇下大家有咩難題，互相學習，互相打氣。
黎到DSE，3年準備時間有唔少人覺得好長。中文未加翻範文之前都唔知有乜好討論。英文同樣。睇翻2014年之前語文討論區既post比較多就係講下唔同詞彙、寫作手法，放篇文出黎求評。其它科目有啲多人講，有啲少人講，部分原因同選修人數有關。
更重要既係，溝通模式既轉變。細個讀書會唔會開一個自己班 /某一個project既whatsapp group呢？會唔會拎左老師個MSN放學同佢message呢？唔會。但而家既學生係可以放學後用whatsapp, telegram等等去溝通，討論佢地既學術問題。另外，搵下Google Play / Appstore 都有啲收錢既問答APP。簡單黎講，論壇唔再係唯一，或者大部分人依賴去討論既地方。你話歸因於管理層管理不善？可能係部分原因。但溝通模式轉變左，大家多左用Whatsapp / telegram / Facebook group去溝通，呢件事係咪小卒當時管理層可以改變倒？
結語：陶淵明既世外桃源好理想。當時既管理層可能都好希望小卒會越黎越多人參與討論，分享心得，分享資源。但時移世易，呢啲“盼望”唔再成真既時候，我唔會再去諗“理想”係乜。換句話說，我會暫時放下何謂“理想的教育”，何謂“理想的小卒”。當前目標，就係喺建制之下，條件因素限制下，做到令最多人得益。
